Бүгін Атырауда дарынды оқушылардың «Дарынды ұрпақ–ел болашағы» атты форумы өтті. Осымен төртінші жыл қатарынан ұйымдастырылып отырған шараға мектеп бітіріп отырған үздік оқушылар қатысты.
Олар «Алтын белгілері» мен ерекше үлгідегі аттестаттарын облыс әкімі Нұрлан Ноғаевтың қолынан алды. Биыл облыста 97 оқушы «Алтын белгі» иегері атанып, 81 түлек үздік аттестатқа қол жеткізді.
Шараға қатысқан аймақ басшысы үлкен өмірге аяқ басып отырған түлектерге ақ жол тіледі:

«11 жыл бойы аянбай етілген еңбектің, ұстаздар мен ата-аналардың тәрбиесінің арқасында жүзден жүйрік, мыңнан тұлпар атандыңыздар. Бүгін сіздерді үлкен өмір жолына шығарып салғалы отырмыз. Ақ жол тілеймін! Өмір даңғыл жол емес, кедергілері де бар. Бірақ әрақашан білімдеріңіз бен тәрбиелеріңізге сеніп еңбек ететін болсаңыздар, абыройлы боласыздар. Елбасының жолдауында, стратегиялық құжатарда көрсетілген Қазақстанның даму бағытына үлес қосатын–жас ұрпақ, яғни сіздерсіздер»,- деді аймақ басшысы.